monumenta.ch > Boethius > bnf8672.58 > bnfNAL1592.502 > sectio 7 > bnf8907.645 > sectio 3 > bnf15046.229 > sectio 5 > bavPal.lat.311.336 > bavPal.lat.311.341 > bkeCod.16.99r > bsbClm6224.103 > bnf15046.205 > bnf8907.242 > sectio 2 > sectio 2 > bnf15046.248 > bsbClm14439.94 > csg899.44 > bnf15046.191 > 2 > sectio 2 > sectio 101 > bkeCod.16.211v > admCod.164.35 > sectio 34 > bnf6158.87 > bkeCod.16.206r > csg211.292 > bnf15046.131 > bnf17226.70 > csg566.112 > bumMs.H125.68 > csg75.840 > csg899.43 > sectio 21 > sectio 21 > ad Hebraeos,3624 > sectio 6 > sectio 3 > sectio 5 > hlw17.228 > bavPal.lat.311.331 > sectio 7 > Lucas, 16 > bkeCod.16.204r > sectio 1 > csg95.76 > bkeCod.16.62r > bnf15046.178 > bnf9389.449 > bnfNAL1592.435 > Ioannes, 21 > habCod.Guelf.81Weiss..142 > bnf15046.177 > sectio 23 > hlw17.213 > 45 > bsbClm6436.46 > sectio 77 > bnf15046.203 > csg48.79 > sectio 8 > salCod.Sal.X,16.314 > sectio 2 > sectio 15

Wortauswahl für das Suchen

Melden Sie einen Fehler in dieser Sectio
Augustinus, Enarrationes in Psalmos, 62, 15
Si memoratus sum tui super stratum meum, in diluculis meditabar in te; quia factus es adiutor meus. Stratum suum quietem suam dicit. Quando aliquis quietus est, memor sit Dei; quando aliquis quietus est, non per quietem dissolvatur et obliviscatur Deum; si memor est Dei quando quietus est, in actionibus suis in Deum meditatur. Diluculum enim dixit actiones, quia omnis homo diluculo incipit aliquid agere. Quid ergo dixit? Si memor fui tui in strato meo, et in diluculis meditabar in te. Si ergo non fui memor in strato meo, et in diluculo non meditabar in te. Qui quando otiosus est non cogitat Deum, in actionibus suis cogitare potest Deum? Qui autem memor eius est quando quietus est, in ipso meditatur cum agit, ne in actione deficiat. Ideo quid adiecit? Et in diluculis meditabar in te; quia factus es adiutor meus. Etenim nisi Deus adiuvet bona opera nostra, impleri a nobis non possunt. Et digna debemus operari; id est tanquam in luce, quando Christo demonstrante operamur. Quicumque operatur mala, in nocte operatur, non in diluculo, Apostolo dicente: Qui inebriantur, nocte inebriantur; et qui dormiunt, nocte dormiunt: nos qui diei sumus, sobrii simus. Hortatur nos ut secundum diem ambulemus honeste: Sicut in die, inquit, honeste ambulemus . Et iterum: Vos, inquit, filii lucis estis, et filii diei; non sumus noctis neque tenebrarum . Qui sunt filii noctis, et filii tenebrarum? Qui omnia mala operantur. Usque adeo filii noctis sunt, ut timeant videri quae operantur: et quae publice operantur mala, ideo publice operantur, quia multi illa operantur; quae pauci operantur, in abscondito operantur. Qui autem talia publice operantur, sunt quidem in luce solis, sed in tenebris cordis. Nemo ergo in diluculo operatur, nisi qui in Christo operatur. Sed qui otiosus memor est Christi, in ipso meditatur in omnibus actionibus suis; et est illi adiutor in bono opere, ne per infirmitatem suam deficiat. Si memoratus sum tui super stratum meum, in diluculis meditabar in te; quia factus es adiutor meus.